โดนเขาอุ้มเหียแล้วก๊า
ละอ่อนโบราณ ยั๋งมาหายสอย บ้านง่อมจอยวอย บ่หันท่านเจ้า
ม่อนแก้วคนลม มานั่งถ้าเฝ้า ใค้หันสุนทร ค่าวจ้อย
ปี้เจ้ามาหาย ใจ๋ปอต่ำหก้อย ไปหลงอยู่ห้อง แห่งใด
ในบอร์ดห้องนี้ คนมากั๋นหลาย แวะมาแอ่วใจ ตี้บ้านท่านเจ้า
เป๋นว่ามาหา บ่มีคนเฝ้า ไปอยู่ตางใด หว่างนี้
ถ้าฝังกำฝอย ค่าวซอกล่าวจี๊ ของละอ่อนฯเจ้า แต่งมา
บ้านปอห่างร้าง มีก่านกก๋า ปอเป๋นป่าคา บ่มีคนเฝ้า
จักมาแอ่วหา ตี้บ้านท่านเจ้า ซ้ำมาหายจอย ซ่อนหลี้
หายแส๊บหายสอย หายลอยหวางนี้ กาว่าหนีหนี้ เงินฅำ
กาว่าไปเส๊าะ หาแก้วตังสาม ตางรสพระธรรม บวชเป๋นตุ๊เจ้า
กาว่าไปหลง ตางลาบหลู้เหล้า ไปเป๋นขี้เมา ขี้ไพ้
ไปหลงสาวจี๋ นารีซ่อนไว้ เลยลืมถิ่นห้อง เฮือนจอง
กาว่าเส๊าะฮิ เงินฅำข้าวของ ขึ้นกองล่องกอง ก๋านก๋องเต็มหน้า
ลาละท่านเฮ๋ย ก้อนแก้วม่อนข้าฯ จักขอเมือลา ก่อนครับ
ฝากกำค่าวสาน หื้อท่านได้ฮับ ปิ๊กมาผ่อบ้าน เฮาแลนายเฮย.