Kartay
เตรียมอนุบาล
ออฟไลน์
กระทู้: 1
|
|
« เมื่อ: วันที่ 27 มีนาคม 2017, 16:31:04 » |
|
✿•*`*•.¸ พระในบ้าน ƸӜƷ✿¸•
บุตต๋าเหย แม่เกยเจ๋บต๊อง ฮ้องไห้ดังก้อง ฮ่ำฮ้องปวดใจ๋ ลูกเอ๋ยลูกฮัก แม่จักขานไข เถิงความห่วงใย ในใจ๋แม่เจ้า ตึงมื้อตึงวัน แม่นั้นผ่อเฝ้า ผ่อแยงคิงเลา เจ้านั้น
ยามเกิดเจ้ามา น้ำต๋าแม่จั๊น ยากจะอดกลั้น หลั่งริน เบ่งลมสุดปิด เบี้ยวบิดตั๋วตี๋น มนุษย์เตวดิน ยากจะทนได้ ต๊องเติ้งเนื้อนวล มวนเลึกเถิงไส้ ร่างก๋ายทรุดใป เหมือนม้าง
เจ๋บเข้ากระดูก ยามลูกเคิ้นค้าง ผดหัวออกข้าง เหงี่ยงสะแกง ปั่นป่วนมวนต๊อง ยามต้องมีดแสง หมอแหกเลือดแดง แข้งปอบิดเบี้ยว ฮ้องฮ้องคางคาง ขบก๋างขบเขี้ยว เจ๋บอยู่คนเดว กั่งกั๊ด
เจ๋บปวดตางใน เหมือนไผขว้างซัด ลมยัดหย้นขึ้น อุรา เจ๋บไผไหนนี้ เต้าอี้ลูกจ๋า ยามเจ้าเกิดมา น้ำต๋าอาบแก้ม ลูกฮักลูกเหย จมเจยแต่งแต้ม เป๋นฮ่มเงาแซม กอดไว้
จีวิตวิไล วันใดแล้วไซร้ ขอเจ้าอย่าได้ ลืมเลือน ว่าแม่ท่านไท้ เผียบได้เสมือน พระแก้วในเฮือน มาโผดลูกเต้า เจ้าจงใส่ใจ๋ เทิดไว้เหนือเกล้า ตอบแตนกุณเอา อย่าร้าง
แม้เจ้าเติบใหญ่ เป๋นนายขึ้นก๊าง ได้เป๋นนายห้าง ใหญ่โต ดูแลแม่นั้น หื้อท่านสุขโข อายุวัณโณ อยู่จ๋นแก่เฒ่า จีวิตจะดี บ่มีโศกเส้า เจ้าจงจำเอา กำไว้
ว่ากตัญญู เอาจูเน้อไท้ จีวิตจักได้ มงคล ลูกจุ๊คน น้อมต๋นหื้อหมั้น แม่จั๊นเจ้าบูชา แหล่นายเฮย
นางฟ้า ชาลี แต้มไว้ 27 มี.ค.60
|