ตามหาทำไมเหรอ อยากรู้
อยู่ในหมู่บ้านธนภูมิ บ้านดู่ ลองไปติดต่อดูนะครับ บ้านชั้นเดียวด้านขวามือ ประมาณ ซอย 8 หรือ ซอย 10 นี่แหละครับ
ซ.10ครับมีคุณยายยุพินอยู่ แต่ว่าตามหาทำไมเหรอครับโทรหาผมก็ได้ครับถ้าเป็นเรื่องสำคัญหรือด่วนผมจะถามพี่จีน่าให้ครับ
บ่ใจ่เรื่องด่วนหยังครับ มอกจะไปถามเรื่องบ่าเก่าของเมืองเจียงฮาย เพื่อเติมเต๋มประวัติศาสตร์บ้านเฮา เนื่องจาก...ต้นตระกู๋ลโทรางกูร คือ พ.ต.ท.เบอร์เธล โทวัลเซน (Pol.Lt.Col. Berthel Thorvaldsen)
เป๋นตำรวจจาวเดนมาร์ก เปิ้นเข้ามาฮับราชก๋ารสมัยรัชก๋าลตี้ 5
ได้มาประจ๋ำตี้เจียงฮาย แลแต่งงานกับเจ้าปา (หลานสาวเจ้าเมืองไชย เจ้าหลวงเจียงฮาย)
คนเจียงฮายฮ้องตำรวจฝรั่งคนหนี้ว่า "ปาปา" หรือ "ปู่ปาเฒ่า"
ปาปาแกชอบไปแอ่วกาดครับ คนเจียงฮายฮู้จักดี อู้เมืองได้
หลังเกษียณ ปาปาเปิดบ้านแกเป๋นโฮงแฮมแห่งแรกของเมืองเจียงฮายจื่อ "โฮงแฮมโทวัลเซน"
ตี้บ่าเดี่ยวก็คือ สภ.เมืองเจียงฮาย หล่ายหน้าฮ้านขายเฟอร์นิเจอร์
ปาปามีลูกหลายคน ลูกบ่าวคนนึ่งของเปิ้นจื่อ ลุงเล็ก อเล็กซานเดอร์ โทรางกูร
คนหนี้เปิ้นเป๋นหัวหน้าเสรีไทย จั๋งหวัดเจียงฮาย เน่อครับ
เวลามีเสรีไทยลุกยูนนานมาเถิงเจียงฮาย แกก็เอาคนหมู่หนี้ไปซ่อนตี้ต๋าบ่มของแกตี้แควหวาย
ตะหารญี่ปุ่นเกยไปกวดผ่อ แต่แกก็รอดมาได้หวุดหวิด
นามสกุลโทรางกูร ตั้งสมัยจอมพล ป. น่อครับ หื้อออกมาเป๋นไทยๆ ต๋ามนโยบายชาตินิยมของท่านผู้นำ
ไหนๆก็ฉลอง 750 ปี๋ เมืองเจียงฮาย เลยว่าจะค้นเรื่องบุคคลสำคัญตี้ถูกลืมขึ้นมาเล่าน่อครับ
คนตี้เกิดบ่ตันจะได้ฮู้ แลภูมิใจ๋ในบรรพบุรุษจาวเจียงฮาย