ถามเรื่อง..พ่อค้างัวต่าง..

[คุณชายมากรัก]

..ตะก่อนสมัยแม่ผมยังเป๋นละอ่อนอุ๊ยหม่อนผมเปิ้นเล่าหื้อแม่ฟังว่า ก่อนที่อุ๊ยหม่อนจะมาตั้งรกรากอยู่เมืองพาน อุ๊ยหม่อนเป๋นพ่อค้างัวต่างอยู่เมืองลี้ เอาครัวต่างหลังงัวขายตั้งแต่เมืองเถิน ไปถึงเมืองเชียงรุ่ง..

..แม่เล่าหื้อผมฟังสั้นๆแค่นี้.. ซึ่งผมกึ๊ดว่าการเดินทางของพ่อค้างัวต่างแต่ละครั้งคงต้องผ่านอะหยังที่นักกว่าที่แม่ผมเล่าไว้..

..ผมพอจะมีข้อมูลเกี่ยวกับพ่อค้างัวต่างอยู่พ่องละ..แต่ขาดข้อมูลเกี่ยวกับวิถีชีวิตของหมู่พ่อค้างัวต่าง..คือผมใคร่ฮู้ว่าวิถีชีวิตในก๋ารเดินทางไปค้าขายแต่ละครั้งเป๋นอย่างใด..ผมใคร่ฮู้ว่าอุ๊ยหม่อนผม เปิ้นใช้ชีวิตอย่างใด..ไผพอจะมีเรื่องเล่าเกี่ยวกับพ่อค้างัวต่างมาเล่าหื้อกั๋นฟังพ่องคับ..

 

[สบายแมน]

เกยดูหนังนายฮ้อยทะมินก่อครับ สมัยก่อนคนที่จะออกไปค้าขายได้ต้องมีวิชาดี
เพราะต้องดูแลทั้งคน งัว และสินค้า  จากโจร เสือ ผีบ้า คนคิดร้าย และอันตรายสาระพัด
ลองหาดูครับม่วนขนาด

[ล้านนานิยม...นิยมล้านนา]

ป้ออุ๊ยผมแกไปก๊าไปขายต่างถิ่น บ้านอยู่เจียงคำ ไปหากิ๋นตางป๋ง แม่เล่าหื้อฟังว่า ปอแกอายุได้ซาวเก้า แกก่ไปก๊าไปขายต๋ามปกติ แล้วบ่แน่ใจ๋ว่าไปฮักไปเมาสาวต่างถิ่นก่อ เหมือนว่าไปโดนยาสั่งเปิ้น ปอแกมาอยู่บ้านแกเจ้บต๊องขนาด แล้วก่เหมือนมีคนแหมคนมาอยู่ในร่างแก เขาอู้ว่า "นายบอกหื้อมาเอาจีวิตคนนี้"
ต๋อนแรกหมู่ปี้หมู่น้องก่ขอแลกเอากับลูกควายหน้อยได้ก่ เปิ้นก่ยอมจะแลกเอาอยู่ เสียเปิ้นกึ๊ดไดบ่ฮู้ บ่ยอมแลกเหีย ก่เลยเอาจีวิตป้ออุ๊ยไป...

พ่อค้างัวต่าง อาจจะต้องป๊ะกั๊บหลายสิ่งหลายอย่าง แหมยังต้องมีความฮู้ในด้านกถาโตย
เหมือนตี้เอาไว้ปกป้องฮักษาตั๋วเก่าแลพรรคพวกต๋ามตี้ได้ป๋ากฏเช่นในเรื่องของ"เสือเย็น"จาอั้นก๊าหาคับ