เล่าอดีตกำหลังหื้อฟังก่อนน่อ
ต๋อนเปิ้นฉลอง 725 ปี๋ เมืองเจียงฮาย สมัยผู้ว่าฯอร่าม เอี่ยมอรุณ
เปิ้นได้แป๋งกำแปงเมืองตี้ห้าแยก แป๋งป้ายปะตู๋เมืองตี้เกยตั้งอยู่
แป๋งหนังสือตี้ระลึก แป๋งวัตถุมงคลหื้อคนมาปูจา เพื่อระดมทุน
รัฐบาลเยอรมันก็มาจ่วยฮอมสตางค์โตยเน่อ
อ้อ ตี้สำคัญ เปิ้นได้แป๋งสะดือเมืองบนคอยตองโตย
ตี้เป๋นเสาหินหลายๆต้นหั้นน่อ ไผเกยไปก็จะฮู้จะหัน
ส่วนงาน 750 ปี๋ เมืองเจียงฮาย
อันหนี้คร้านอู้ละ ผมบ่ได้หวังว่างานต้องยิ่งใหญ่อลังก๋าร
ถ้าเลือกได้ ผมอยากหื้อคนเจียงฮายฮับฮู้ตั๋วตนของตั๋วเก่าดีกว่า
มีสักกี่คนตี้จะฮู้ว่า คนในเวียงเจียงฮายส่วนใหญ่สืบเจื้อไทเขิน
ตั้งแต่สันโก้ง เด่นห้า หนองบัว สันขี้เบ้า ศรีทรายมูล
ไผฮู้พ่องว่า "พญามังราย" เปิ้นจื่อหนี้ บ่ใจ่จื่อ "พ่อขุนเม็งราย"
ไผฮู้พ่องว่า เมืองเจียงฮายมีเจ้าหลวง 4 องค์
ไผฮู้พ่องว่า คน "จีนแคะ" เป๋นคนจีนตี้มีบทบาทพัฒนาเศรษฐกิจของบ้านเฮา
ไผฮู้พ่องว่า จาวบ้านสันป่าก่อ สืบสายไตใหญ่จากรัฐฉาน เกยเป๋นคนในบังคับอังกฤษ
ไผฮู้พ่องว่า เกยมีป๋าเวณีแป๋งขัวแตะข้ามน้ำกกไปปูจาถ้ำพระ
ไผฮู้พ่องว่า มิชชันนารีฝรั่งเป๋นคนบุกเบิกยุคสมัยใหม่ของเมืองเจียงฮาย
ตึงก๋ารศึกษา ก๋ารแพทย์ รวมทั้งวัฒนธรรม
มีก๋ารแป๋งสนามเทนนิสแห่งแรกในล้านนาตี้บ้านพักหมอโฮงยาฝรั่ง
มีก๋ารเลี้ยงขันโตกดินเนอร์ในวันคริสต์มาสครั้งแรกในล้านนา
ไผฮู้พ่องว่า ช่วงสงครามโลกเตื้อตี้ 2 เจียงฮายเป๋นตี้ตั้งค่ายของตะหารไทย กับตะหารญี่ปุ่น
ตะหารไทยยึดโฮงยาฝรั่งเป๋นโฮงยาสนาม ส่วนตะหารญี่ปุ่นตั้งกองบัญชาก๋ารตี้โลโบ้
บางส่วนไปอยู่วัดเชตวัน (วัดพระนอนหนองบัว)
ไผฮู้พ่องว่า กาดเทศบาล 1 ตะก่อนเป๋นต๋องตึง โดนไฟไหม้ใหญ่ปี๋ พ.ศ.2495
ต่อมา ในปี๋ พ.ศ.2510 มีก๋ารปรับปรุงครั้งใหญ่ เป๋นหลังคาสังกะสี
ไผฮู้พ่องว่า ต้ารถเก่าเจียงฮายแป๋งปี พ.ศ.2514 ตะก่อนตี้หั้นเป๋นหนองเป๋นนา น้ำท่วมหมั่น
หลังแป๋งต้ารถแล้ว ตี้ดินแถวหั้นราคากระฉูด กล๋ายเป๋นศูนย์กล๋างเศรษฐกิจแห่งใหม่ของเมือง
คนตี้ได้ประโยชน์คือตระกูล จง. ตี้เป๋นคนบริจาคตี้แป๋งต้ารถ แลเป๋นเจ้าของตี้ดินรายใหญ่แถวหั้น
ไผฮู้พ่องว่า ขะหนนซูปเปอร์ หรือ พหลโยธินสายนอก แป๋งปี๋ พ.ศ.2512
โดยแลกมากับก๋ารเวนคืนตี้ดินของจาวบ้านศรีทรายมูลเป๋นสิบๆหลัง
เพื่อพัฒนาโครงข่ายก๋ารคมนาคมของจั๋งหวัดแลของภูมิภาค
ฯลฯ
เวลา 750 ปี๋ ของเมืองเจียงฮายมีอะหยังแหมจ้าดนักหื้อลูกหลานได้ภูมิใจ๋เน่อ
คับ
750 ปี๋ เมืองเจียงฮาย 750 ปี๋ ของไผ?