ตี้เจียงใหม่มีวัดสำคัญๆหลายวัด ตึงวัดพระธาตุดอยสุเทพ
วัดเจดีย์หลวง วัดพระสิงห์ วัดเจียงหมั้น ฯลฯ
แต่แปลกใจ๋ขนาดน่อ ตี้บ่มีไผไปวัดกาหละก้อด วัดตี้เก่าสุดเป๋นตี้ 2 ของเวียงเจียงใหม่
(วัดเจียงหมั้นเก่าสุดเป๋นตี้ 1 วัดหนี้แป๋งพร้อมกับเวียงเจียงใหม่)วัดกาหละก้อด มีพระเจ้าก้าฅิงพญามังราย (เวลาเขียนหื้อเขียนเป๋น ค่าฅิง = เต้าตั๋ว)
พระเจ้าองค์หนี้พญามังรายเปิ้นแป๋งที่เวียงกุมกาม พญาปะกับพระกัสสปะแลลูกสิกข์แหม 4 คน
เปิ้นได้ฟังธรรมก็เกิดศรัทธา เลยหื้อสล่าจื่อกานโถมแป๋งพระเจ้า 5 องค์
นั่ง 3 องค์ ยืน 2 องค์ อันนึ่งใหญ่สูงเต้าฅิงพญามังราย
ต่อมา พ.ศ.1839 พญามังรายแป๋งเมืองเจียงใหม่ เปิ้นก็เอาพระเจ้าสำคัญๆ
ขนลุกหละปูนกับเวียงกุมกามมาเจียงใหม่ พญาหื้อเอาพระแก้วขาวกับพระศิลาไว้วัดเจียงหมั้น
ส่วนพระเจ้าก้าฅิง แต้ๆแล้วเปิ้นก็จะเอามาไว้ตี้วัดเจียงหมั้นเหมือนกั๋น แต่เกิดเหตุเหียก่อน
คือ ต๋อนตี้ลากพระเจ้าเข้าเวียงเจียงใหม่ ไม้กานมันหัก เยียะหื้อไปต่อบ่ได้
พญามังรายหันเป๋นนิมิต กึดว่าพระเจ้าเปิ้นใคร่อยู่ตี้หั้น พญาเลยแป๋งวัดตั๊ดหั้น
ฮ้องว่าวัดกานก้อด (ไม้กานก้อดหัก) แล้วหื้อพระเจ้าก้าฅิงอยู่ในวิหารวัดหนี้
วัดกานก้อด มีหลายจื่อ เจ่น วัดกาหละก้อด วัดศรีสร้อยท้าแจ่ง เป๋นเก๊า
ต่อมา ผะมาณ พ.ศ.2470 สมัยพระเทพมุนี (ปลด กิตฺตโสภโณ) เจ้าอาวาสวัดเบญจมบพิตร
เป๋นเจ้าคณะมณฑลพายัพ วัดกาหละก้อดเปลี่ยนจื่อเป็นวัดพระเจ้าเม็งราย
แล้วใจ้มาจนเถิงบ่าเดี่ยว
กู่ปี๋วัดจะมีงานสักการะพระเจ้าก้าฅิงพญามังราย 2 เตื้อ เตื้อนึ่ง วันตี้ 15 เมษายน สักการะพระเจ้าตึงวัดเลย
แหมเตื้อ เป๋นงานสักการะพระเจ้าก้าฅิงองค์เดียวเลย เซิ่งจัดในวันขึ้น 15 ค่ำ เดือน 7 (เดือนเมือง)
พระเจ้าก้าฅิงพญามังราย กรมศิลป์เปิ้นประกาศหื้อเป๋นโบราณวัตถุแล้วน่อครับ
เถิงวัดกาหละก้อดจะเป๋นวัดเก่า แลมีพระเจ้าสำกัญอย่างพระเจ้าก้าฅิงพญามังราย
แต่ก็บ่ล่ำมีไผมาแอ่ววัดหนี้ บ่ฮู้เป๋นต่าบ่าหยัง จะว่าวัดหนี้อยู่ในจ้อกมันก็ถูก
จะว่าเปิ้นบ่าโฆษณาวัดหนี้ มันก็ใจ่ แต่ก็ดีไปอย่างน่อ คนบ่นักดี บ่ต้องลู่กั๋นไหว้พระ
ถ้าไผได้ไปเจียงใหม่ก็แว่ไปแอ่วผ่อเน้อครับ วัดหนี้อยู่ในเขตกำแปงเมืองหั้นแล
อยู่ขะหนนราชมรรกา ซอย 6 ใกล้ๆโฮงเฮียนอนุบาลเจียงใหม่น่อเครดิตฮูป
http://www.bloggang.com/viewdiary.php?id=moonfleet&month=10-2009&date=20&group=113&gblog=89